العربي المستقل
#أخذت_قرار_إبترها – #لا_أوعك_تخطي_هالخطوة…
#بوست_مش_للنقاش، البوست #لشوف_آراء اللي بعرفهن واللي ما بعرفهن عندي عالصفحة بشي هو مصيري بحياتي…
كتار منكن بيعرفو حالتي، بس للي ما بيعرف رح إحكي كل شي…
أنا من لما خلقت عندي قُصر بين الإجرتين متل ما واضح بالصورة، عمري 19 سنة، صرلي 18 بتعالج عند “القديس” البروفيسور عصمت غانم، و صرت عامل 31 عملية..
المهم، بال 2010 عملت عملية بمستشفى محترمة و طول و عرض بس ما رح سميها، و لقطت من غرفة العمليات اللي هي مفروض تكون 0% جراثيم، لقطت بكتيريا اللي هي تُعتبر على رأس هرم الأمراض الجرثومية و اللي هي Staphylococcus aureus، و اللي Resistant Bacteria يعني بكتيريا مقاومة، بتكوِّن جهاز مناعة خاص فيها بيحارب أيا دوا إلتهاب (Antibiotic).
و من وقتها لابدة بالعظم و بس تتوفرلها البيئة المناسبة و اللي هي بشكل خاص جسم غريب (مثل الجهاز او “السياخ” اللي بالصور و اللي انا تلت رباع علاجي عن طريقو)، او رطوبة، هوا… بتفوع و بتنتشر مكان العملية هيدي إذا ما تفشت بالدم كمان مثل ما مرة صار معي…
و أنا عندي حالة نادرة و في منها بس حالتين ب لبنان أنو إجري ما بتربي عظم ، ما بتعمل (ossification)، ف هيدا الشي حاطتني بحكم إني ضل مثبت العظمة عندي بهيدا الجهاز، و متل ما قلنا فوق، إنو هيدا عنصر مناسب لتنتشر البكتيريا، و كمان شغلة، إنو أنا قد ما صرت فايت ع عمليات و مارق بأوجاع و إدوية، عندي شي من تلف الأعصاب او الأفضل نقول Hyper Algesia، و اللي هيي إن جسمي حساس عالوجع و تأقلم مع كل الإدوية من فصيلة الMorphine اللي هو اقوى مسكن وجع، يعني وجعي صعب و الله لا يذوقو لحدا و ما بيعمل معو شي المسكن…
انا بهالسنتين إلا، هالبكتيريا صارت مفشليتلي مش أقل من 7 عمليات 3 منهن بظرف 40 يوم، و حالياً أنا عم عاني نفس الشغلة، إلتهاب، و قاعد بكتب البوست هلق من المستشفى صرلي ١١ يوم فيها، و اليوم صار معي كريزة وجع بعمري مش صايرة معي لدرجة إني شلخت المصل من إيدي و شبقت إجري بالتخت نزفت دم و يمكن خلخل السيخ و هالشي خلاني فوت بصدمة شي ساعة و شوي إنو انا شو صار معي..
انا حالياً عم بمرق ب دوامة، إجري ما بتربي عظم، يعني ما فيني إلا ما حط الجهاز (السياخ)، يعني البكتيريا غير إنها لابدة بجسمي، إذا حاربتها بالعظم رح تقعد عالجسم الغريب اللي هوي السيخ اللي فايت بالعظم و بتعمل غلاف عليها مش ايا دوا بيخترقو يعني ما بتموت، يعني رح اعمل هالعملية و رح ترجع تلتهب إجري و دور بنفس الدوامة….
فوصلت لقرار من زمان بفكر فيه، إني إبترها من تحت الركبة و ركب طرف، هيدا الحل الوحيد لإخلص من الحلقة المفرغة اللي انا عالق فيها، اهلي أيدوني، و من نص ساعة كان عندي دكتور مساعد دكتوري الأساسي أيدني بكل اللي حكيتو و كل ما قلو شغلة يقلي حكيك مظبوط، و قسم تاني ما أيدني بالمرة…
فهلق طالب رأي كل اللي قرأ البوست بقراري اللي انا بكرا رح ناقش فيه الحكيم و انا مقتنع فيه و الحكيم ما رح يقلي لا…
بكل حرية إحكي و عطيني رأيك و شكراً سلف❤
القرار أنا آخذو و مخلص و مسلّم بس حبيت شوف رأي اصحابي و قرايبي و اساتذتي و الكل❤
