العربي المستقل
كتب يوسف يونس، المسؤول الاعلامي في نادي العهد الرياضي..
بعد اللي صار مبارح، منيح نحكي كلمتين:
العهد أحرز ثلاث نقاط بالسداسية واقترب أكتر من المنافسة على الصدارة.
مبارح، تبيّن قديه الفوتبول اللبناني بيندار بالضجة، والنادي اللي ما بيدق الطبل حواليه، ما بيلاقي على وسائل التواصل جمهور وإعلاميين ترقصله.
مش أول مرة حكم بيغلط، صارت كتير أخطاء ومرقت عادي لأنه ما كان العهد مستفيد منها وكان ضحية الها، وما كان فيه مصلحة عند بعض العالم تكسر الصورة النمطية اللي عم ترسّخها عن العهد انه ما بيربح إلا بالحكام.
بعد ما نمنا وصفيت اذهاننا منيح نرجع نراجع الأخطاء بصوت العقل.
الحالات الإشكالية بالمباراة (عم قول حالات إشكالية لانها بحاجة لتدقيق على كاميرات التلفزيون وبفقرات التحكيم) استفاد منها الفريقين:
– الهدف التاني للعهد (فائدة للعهد)
– خروج حارس شباب الساحل خارج منطقته وصد انفرادية (فائدة لشباب الساحل).
– طرد نور منصور (استفاد منه شباب الساحل) مش صحيح انه شباب الساحل ما استفاد لأنه سيطر بعدها على المباراة بشكل كامل وكان قادر يقلب النتيجة بس ما توفق بالتسجيل، علما انه قبلها فيه لمسة يد على النيجيري بوبي سمحت للمهاجم بالانفراد. يعني اساس وصول المهاجم للانفراد خطأ.
– البنالتي اللي طالب بها شباب الساحل بعد ما لمست التسديدة يد حسين دقيق بمنطقة العهد، هيي حالة إشكالية لانه العهد بيقول انه الكرة اساسها تسلل.
– البنالتي اللي طالب فيها العهد بعدما اصطدمت الكرة بيد المدافع النيجيري لشباب الساحل وحولتها لكورنر، كمان حالة اشكالية.
كلها حالات إشكالية بتدل انه الفريقين كان عندهم حالات اشكالية لمصلحتهم، والخطأ ما استفاد منه فريق واحد او على الأقل مش بنفس النسبة.
الحياة بتعلم الانسان يصبر وما ينجر دغري ورا مشاعره خصوصا انه فيه كتير ناس بيستغلو اي فرصة حتى لو كانت تافهة للاساءة لفريق العهد، فكيف اذا كانت الحالات فيها إشكاليات حقيقية؟
اللي بيحب انه تصير كل المباريات المقبلة تحت الضغط على الحكام، فبحب قول للجميع انه كل الفرق رح تلعب وكل جمهور قادر يصلي للفريق المنافس، وكل الفرق عندها جمهور على وسائل التواصل وإعلاميين ما بيبيّنو إلا اذا فيه شي ضد العهد (هني هيك، بيفيق الحس الإعلامي لما بيكون فيه شي ممكن استغلاله ضد العهد).
كل الفرق رح تلعب مباريات وممكن كتير يصير فيها أخطاء، وكتير أندية اوقات بتستفيد وأوقات بتتضرر من أخطاء الحكام، والحكي انه العهد بس بيستفيد هوي صورة نمطية تابعة لدعاية قديمة، ومملة.
على كل حال، الدوري بعد ما خلص، خلونا نشوف اذا حكامنا بمباريات كل الفرق سوبر حكام، وما ما بيغلطو الا بمباريات العهد.
ملاحظة:
الصورة تحت بترد الفوز لأصله، لاعب محترف على مستوى عالي استطاع ترجمة مجهود الفريق بشكل ما كان العهد قادر يعمله قبل.
